აფხაზეთის განათლებისა და კულტურის სამინისტროს 2010 წლის ბიუჯეტი

        აფხაზეთის ა/რ მთავრობამ აფხაზეთის განათლებისა და კულტურის სამინისტროს 2010 წლის ბიუჯეტი დაამტკიცა. სამინისტროს ბიუჯეტი განისაზღვრა 2.633.420 ლარით, რაც აფხაზეთის მთავრობის საერთო ბიუჯეტის 22.84% წარმოადგენს. მთავრობის თავმჯდომარის გიორგი ბარამიას განცხადებით, აფხაზეთის მთავრობისათვის პრიორიტეტულია ჯანდაცვის, განათლებისა და კულტურის სფეროები. თავის მხრივ, აფხაზეთის განათლებისა და კულტურის სამინისტროს მიერ განათლების სფეროში დასახელებული პრიორიტეტებია საქართველოს განათლებისა და მეცნიერების სამინისტროს რეფორმების მხარდაჭერა აფხაზეთის განათლების სექტორში და აფხაზეთის სკოლებში სამშვიდობო განათლების პოლიტიკის გახორციელება, რომლის ფარგლებში დაგეგმილია ახალგაზრდების მხარდაჭერისა და ქართულ–აფხაზური სასკოლო პარტნიორობების ინიციატივების განვითარება და ოკუპირებულ გალის რაიონში ქართული საგანმანათლებლო პროცესისა და აფხაზური ენის პროგრამების ხელშეწყობა.
          კულტურის სფეროს მიმართულებით, 2010 წელს სამინისტროს დებულებაში შევიდა ცვლილება, რომლის მიხედვით სამინისტრომ აფხაზეთის კულტურულ მემკვიდრეობაზე ზრუნვისა და მისი წარმოჩინების ვალდებულება აიღო. სამინისტრო კვლავ გააგრძელებს სახელწიფო ანსამბლის, აფხაზური ფოლკლორის, ოკუპირებულ ტერიტორიაზე არსებულ ბავშვთა და მოზარდთა შემოქმედებითი ჯგუფების მხადაჭერას და კონფლიქტის ზონაში არსებული კულტურულ საგანმანათლებლო დაწესებულებების ქართულ სივრცესთან დაახლოების პროგრამებს. თავისი აქტივობებით, აფხაზეთის განათლებისა და კულტურის სამინისტრო ხელს შეუწყობს ოკუპირებულ ტერიტორიებთან მიმართებაში სახელმწიფო სტრატეგიის განხორციელებას.